06/01/2026
محکمہ زراعت توسیع لودھراں اور فاطمہ فرٹیلائزر کمپنی کا مشترکہ آگاہی پروگرام
محکمہ زراعت توسیع لودھراں اور فاطمہ فرٹیلائزر کمپنی کے اشتراک سے بہتر پیداوارِ گندم کے حوالے سے ایک اہم اور مفید آگاہی پروگرام ڈیرہ چوہدری محمد سعید پر منعقد کیا گیا۔ اس پروگرام میں ضلع لودھراں کے معزز کاشتکاروں کی بڑی تعداد نے شرکت کی۔
پروگرام میں خصوصی طور پر ڈپٹی ڈائریکٹر ایگریکلچر لودھراں، جناب ملک محمد ظفر صاحب نے شرکت فرمائی اور کاشتکاروں کو گندم کی بہتر اور معیاری پیداوار حاصل کرنے کے لیے جدید زرعی طریقۂ کار سے آگاہ کیا۔ انہوں نے بالخصوص جڑی بوٹیوں کے مؤثر کنٹرول، کھادوں کے متوازن اور بروقت استعمال پر تفصیلی روشنی ڈالی اور کاشتکاروں کو سائنسی بنیادوں پر فصل کی دیکھ بھال کی اہمیت سے آگاہ کیا۔
اس موقع پر جناب ملک محمد ظفر صاحب نے وزیراعلیٰ پنجاب کی جانب سے زراعت کی ترقی کے لیے شروع کیے گئے مختلف فلاحی منصوبوں اور زرعی اسکیموں کے بارے میں بھی کسانوں کو تفصیل سے آگاہ کیا تاکہ وہ ان منصوبوں سے بھرپور فائدہ اٹھا سکیں۔
پروگرام میں محمد رفیق شہزاد، ایگریکلچر آفیسر لودھراں نے بھی شرکت کی اور محکمہ زراعت کی جاری سرگرمیوں اور کسان دوست اقدامات پر روشنی ڈالی۔
جبکہ فاطمہ فرٹیلائزر کمپنی کے آفیسر میاں احمد صاحب نے کھادوں کے درست انتخاب، مقدار اور استعمال کے طریقہ کار پر جامع بریفنگ دی اور کسانوں کے سوالات کے تسلی بخش جوابات دیے۔
اس کامیاب پروگرام کے انعقاد میں چوہدری امتیاز سعید صاحب کا کردار قابلِ تحسین رہا جنہوں نے نہایت شاندار انتظامات کیے، افسران اور کاشتکاروں کا پرتپاک استقبال کیا اور اپنے ڈیرے پر محبت، خلوص اور مہمان نوازی کی اعلیٰ مثال قائم کی۔ انہوں نے محکمہ زراعت توسیع لودھراں کی کارکردگی اور کسانوں کے لیے کی جانے والی عملی کاوشوں کو سراہا۔
یہ پروگرام کاشتکاروں کی رہنمائی، زراعت کی ترقی اور بہتر پیداوار کے حصول کی جانب ایک مؤثر اور مثبت قدم ثابت ہوا۔
