07/05/2022
شوگر ، بلڈ پریشر کے مریضوں کے لیے دیسی گھی کا استعمال کیسا ہے
لاہور(نیا ٹائم ویب ڈیسک) غذائی ماہرین نے شوگر اور بلڈ پریشر کے مریضوں کے لیے دیسی گھی کے استعمال کو مفید قرار دے دیا۔
ذیابیطس کے مریضوں میں ہمیشہ ایک الجھن رہتی ہے کہ کیا کھایا جائے اور کیا نہ کھایا جائے۔ کچھ لوگ گھی، تیل اور مصالحہ جات سے پرہیز کرنے کا مشورہ دیتے ہیں جب کہ کچھ کا کہنا ہے کہ دیسی گھی کا استعمال غلط ہے۔ایسی حالت میں غذائی ماہرین کی تحقیق سے رہنمائی لینی چاہیے۔
ماہرین خوراک کے مطابق دیسی گھی میں جو چکنائی موجود ہوتی ہے وہ آپ کے کھانے میں موجود غذائی اجزاء کو ختم نہیں ہونے دیتی۔اس کے ساتھ وٹامنز اور اینٹی آکسیڈنٹس کی موجودگی بلڈ پریشر اور شوگر لیول کنٹرول کرنے میں اہم کردار ادا کرتی ہے۔لیکن اس بات کا خیال رکھنا ضروری ہے کہ اس کی مقدار حد سے زیادہ نہیں ہونی چاہیے۔
ماہرین نے دعویٰ کیا ہے کہ دیسی گھی کے استعمال سے جسم میں کولیسٹرول لیول کو بھی کنٹرول کیا جا سکتا ہے جس کی زیادتی دل کی بیماریوں اور بلڈ پریشر میں اتار چڑھاؤ کا باعث بنتی ہے۔اس کے علاوہ دیسی گھی کے استعمال سے آنتوں کے ہارمونز بھی بہتر طریقے سے کام کرتے ہیں جس کی وجہ سے انسان بہت سی بیماروں سے محفوظ رہتا ہے۔
یاد رہے کہ ماہرین نے خبردار کیا ہے کہ ذیابیطس اور بلڈ پریشر کے مریضوں کو کوکنگ آئل اور بناسپتی گھی کا استعمال مکمل طور پر بند کر دینا چاہیے کیونکہ یہ جسم میں کولیسٹرول کی مقدار میں اضافہ کرتے ہیں جو شوگر اور بلڈ پریشر کی بیماریوں کا باعث بنتا ہے۔
