06/04/2026
ایران نے امریکا اور اسرائیل کو سخت وارننگ دیتے ہوئے کہا ہے کہ اگر ان کے حساس تنصیبات پر حملے کیے گئے تو دشمن کے لیے جہنم کے دروازے کھل جائیں گے۔
خاتم الانبیا سینٹرل ہیڈ کوارٹرز کے کمانڈر میجر جنرل علی عبداللہی نے امریکی صدر ڈونلڈ ٹرمپ کے بیانات کے جواب میں کہا کہ ایران کے حساس تنصیبات پر کسی بھی قسم کا حملہ ناقابل برداشت ہوگا اور اس کا فوری اور سخت جواب دیا جائے گا۔
جنرل عبداللہی نے مزید کہا کہ صدر ٹرمپ مسلسل شکستوں کے بعد بے وقوفانہ اور جارحانہ بیانات دے رہے ہیں، اور اگر آئندہ کوئی غلطی ہوئی تو امریکی اور صہیونی فوجی ٹھکانوں پر شدید حملے کیے جائیں گے جو انہیں سنبھلنے کا موقع نہیں دیں گے۔ انہوں نے زور دے کر کہا کہ ملکی اثاثوں کی حفاظت کے لیے ایک لمحہ بھی ضائع نہیں کیا جائے گا۔
یہ بیان اسی دن سامنے آیا جب امریکی صدر ڈونلڈ ٹرمپ نے ایران کو 48 گھنٹوں کی مہلت دیتے ہوئے مطالبہ کیا کہ وہ آبنائے ہرمز کو دوبارہ کھول دے، ورنہ ان پر قیامت ڈھا دی جائے گی۔ بعد ازاں ٹرمپ نے سوشل میڈیا پر رات کے وقت ہونے والے دھماکوں کی ویڈیو شیئر کی اور دعویٰ کیا کہ تہران پر ایک بڑے حملے میں ایران کے کئی اعلیٰ فوجی رہنما مار دیے گئے ہیں۔
اس تناؤ کے درمیان عالمی سطح پر خدشات بڑھ گئے ہیں، اور خطے میں کشیدگی مزید گہری ہو سکتی ہے۔
