19/05/2026
رزقِ حلال اگر جوتے گانٹھ کر یا جھاڑو لگا کر بھی مل رہا ہو تو وہ حرام سے حاصل کی گئی دنیا جہاں کی دولت سے افضل اور بہتر ہے۔۔۔
محنت مزدوری سے رزقِ حلال کمانے کا کوئی بھی جائز ذریعہ اپنانا قابل عزت عمل ہے اور اس پر فخر کرنا چاہئے کہ اللہ رب العزت اس گئے گزرے دور میں بھی حلال رزق کمانے کی توفیق دے رہا ہے۔۔۔
قابل ملامت اور برا کام صرف بھیگ مانگنا, فضول ادھار لینا, دوسروں کے حق پر ڈاکے ڈالنا اور دوسروں کے مال چھین کر اپنا پیٹ پالنا ہے دوسروں کو دھوکے دے کر بدیانتی کر کے جھوٹ بول کر مال کمانا سراسر ہلاکت ہے۔۔۔
دنیا کا کوئی بھی کام چھوٹا نہیں ریڑھی لگانا, چھابڑی فروشی یا کوئی بھی ایسا کام جس سے رزقِ حلال حاصل ہو وہ چھوٹا نہیں اور قابل عار و ملامت نہیں جو بھی حلال رزق کی بے قدری کرے یا عار کرتا ہے یقیناً یہ بہت زیادہ فکر والی بات ہے۔۔۔
بیروزگاری, تنگی معاش کے باوجود کوئی چھوٹا موٹا کام کرنے میں عار محسوس کرتے ہیں۔۔۔ ریڑھی یا چھابڑی اس لئے نہیں لگاتے کہ لوگ کیا کہیں گے۔۔۔ جان پہچان والے کیا سوچیں گے۔۔۔ لوگ طعنے دیں گے باتیں بنائیں گے۔۔۔
یہی لوگ جن کی بے عزتی کا ڈر ہے یا جن کے طعنوں کا خوف ہے کیا ان لوگوں نے کبھی آپ کے ساتھ تعاون کیا۔۔۔؟ یا آپ سےکبھی پوچھنے کی زحمت کی کہ حالات کیسے گزر رہے ہیں۔۔؟ یا آپ کا کسی مشکل اور معاملے میں ساتھ دیا۔۔۔
لوگوں کا تو کام ہے ٹانگیں کھینچنا۔۔۔ پیٹھ پیچھے باتیں کرنا۔۔۔ حوصلہ شکنی کرنا۔۔۔ چغلی و غیبت کر کے ضمیر و نفس کو خوش کرنا۔۔۔ اگر ہم لوگوں کی باتوں اور طعنوں کی پروا کرتے رہے, لوگوں کی باتوں پر توجہ دیتے رہے, لوگوں کے ڈر سے احساسِ کمتری میں مبتلاء ہوگئے تو ہم دنیا کا کوئی کام نہیں کر سکیں گے اور ایک دن فاقوں سے مر جائیں گے۔۔۔
لہذا کوئی بھی ایسا کام جس سے حلال رزق میسر ہو اس کو اپنا کر خود پر فخر کریں کہ اللہ نے محنت مزدوری کرکے حلال رزق کمانے کی ہمت اور توفیق دی۔۔۔
ہمارے آس پاس بہت سے ایسے لوگ ہوں گے جو معذوری, بیماری اور حالات کی وجہ سے کچھ بھی کرنے کے قابل نہیں۔۔۔ کرنا بہت کچھ چاہتے ہیں مگر معذوری, بیماری اور حالات کی وجہ سے کچھ کر نہیں سکتے۔۔۔
اگر آپ صحت مند ہیں۔۔۔ اللہ نے کسی بڑی بیماری اور آزمائش سے محفوظ رکھا ہوا ہے تو اپنے آپ کی قدر کریں۔۔۔ اللہ کا کروڑوں بار شکر ادا کریں۔۔۔ اور اپنی کامیابی کے لئے دل لگا کر جدوجہد کریں۔۔۔ محنت کو اپنا شعار بنا لیں۔۔۔
کامیابی آپ کے ارادے اور نیت سے صرف چند قدم کے فاصلے پر ہے۔۔۔