24/02/2024
စက်ရေတွင်းတူးတဲ့အခါ ရေရှိ/ မရှိ၊ ရေ-နည်း/ရေများတဲ့ ပြဿနာလေးတွေ ခန့်မှန်းသိရှိနိုင်ပုံလေးကို ဗဟုသုတ အနေနဲ့ ဝေမျှပေးပါရစေရှင်။
ရေ-ရှိ/မရှိ
၁။ အရွက်အမြဲတမ်း ရှိနေတတ်သော အုန်းနှဲပင်၊ မယ်ဇလီပင်၊ မြက် စတဲ့အပင်တွေ စိုစိုပြေပြနဲ့ လန်းလန်းဆန်းဆန်းရှိနေတယ်ဆိုရင် အဲ့နေရာမှာ ရေရှိတယ်လို့ မှတ်ယူနိုင်ပါတယ်။
ရေချို/ရေငန်
၂။ အနီးအနားတွင်ရှိတဲ့ သစ်ပင်တွေက အပင်အမျိုးအစားခြင်းတူပါလျက် တခြားနေရာမှာရှိတဲ့ သစ်ပင်က အရွက်တွေထက် အနာအဆာများပြီး အစိုဓါတ်ခမ်းခြောက်နေရင် ရေငန်လို့ ခန့်မှန်းနိုင်ပြီး၊ သစ်ပင်က အရွက်တွေက စိမ်းလန်းစိုပြည်နေပါက ရေချိုလို့ သတ်မှတ်နိုင်ပါတယ်။
ရေတိမ်/ရေနက်
၃။ အနီးအနားက သစ်ပင်တွေက အဆစ်တိုနေရင် ရေတိမ်- ရေနီးတဲ့ နေရာလို့ ခန့်မှန်းနိုင်ပြီး အဆစ်ရှည်နေပါက ရေနက်- ရေဝေးတဲ့နေရာလို့ ခန့်မှန်းနိုင်ပါတယ်။
ကျောက်ဆောင်- ရှိ/ မရှိ
၄။ အနီးအနားတဝိုက်က သစ်ပင်ကြီး၊ သစ်ပင်ငယ်တွေဟာ ကြုံလှီ,ပုကျစ်၍ တွန့်လိမ်, ကွေ့ကောက် နေတယ်ဆိုရင် မြေအောက်မှာ ကျောက်ဆောင်ရှိတတ်ပါတယ်။ အဲလိုမဟုတ်ဘဲ သစ်ပင်တွေက ဖြောင့်တန်းတယ်ဆိုရင်တော့ ကျောက်ဆောင် မရှိတတ်ပါဘူး။
ရေချို/ရေငန် (တဝက်စီ)
၅။ ရေတွင်းတူးမယ့်နားက သစ်ပင်တွေက တစ်ခြမ်းက အနာဆာကင်းပြီး တစ်ခြမ်းက ချောမွေ့နေရင် ရေငန်-ရေချို တစ်ခြမ်းစီ ရောစပ်နေတဲ့ နေရာလို့ ခန့်မှန်းသိရှိနိုင်ပါတယ်။
နောက်ထပ် ထမင်းအိုးနဲ့ စမ်းသပ်နည်းလေးကိုလည်း ဝေမျှပေးချင်ပါတယ်။
ချိုး(ဂျိုး)ကပ်နေတဲ့ ထမင်းအိုးကို စလောင်းဖုံးဖွင့်၊ မြေကြီးကို တွင်းတူးပြီး၊ မြေတွင်းထဲမှာ အိုးကို တစ်ညသိပ်ပါ။
နောက်တစ်နေ့ အိုးကို ဖော်ကြည့်တဲ့အခါမှာ ထမင်းအိုးဖင်က ထမင်းချိုး(ဂျိုး)က ရေနူးပြီး ကွာကျနေရင် ရေတိမ်-ရေနီးတယ်လို့ ခန့်မှန်းနိုင်ပါတယ်။ နည်းနည်းလောက်ပဲ စိုပြီး ထမင်းချိုး ကွာမကျရင်တော့ ရေနက်တယ်လို့ ဖြစ်ပါတယ်။
ထမင်းချိုး(ဂျိုး)ကို စားကြည့်တဲ့အခါမှာ ငန်နေရင် ရေငန်လို့ သတ်မှတ်နိုင်ပြီးတော့ ချိုနေရင်တော့(ပုံမှန်အရသာပဲ ဖြစ်နေရင်တော့) ရေချိုလို့ သတ်မှတ်
နိုင်ပါတယ်ရှင်။
အခုဖော်ပြပေးခဲ့တာလေးတွေကတော့ ပညာရှင်ကြီးတွေရေးသားဖော်ပြထားတာလေးတွေထဲကနေ ပြန်လည် ထုတ်နှုတ် ရေးသားထားတာဖြစ်တဲ့အတွက် မူရင်း ပြုစုသူအား လေးစားစွာ ဂုဏ်ပြုအပ်ပါတယ်
