26/08/2026
و انا نكتب في في الستاتو هذا تفكرت الي في نفس اللحظة هاذي و في مكان ما من الكرة الارضية فمة مواطنين شائت الاقدار انهم يتولودو و يعيشو في الغرب و في العالم المتقدم ، قعدت نخمم كيفاش الناس هاذوما عايشين في رتوبية تقتل، العالم متاعهم عبارة على خط مستقيم. العالم هبل بالذكاء الاصطناعي والتطور.. وهوما مساكن ما فيبالهمش اللي التونسي سابقهم بأشواط في "الذكاء الإستراتيجي للبقاء".
تخيل مواطن سويدي او ياباني يقضي شؤونو الإدارية لكل عن بعد بapplication على تليفونو وهو قاعد في بيتو! كيفاش باش تبني شخصيتك؟ كيفاش باش تحتك بالمجتمع؟ قريب يمرض بالتوحد! لا يتعارك مع عون، لا يمرجو على ورقة، لا يسرقوه في بعض الدنانير مالماندة متاعو، لا يعيش الفرحة الهيستيرية متع "السيستام رجع".. حرمان عاطفي واجتماعي كبير!
كي يعطش يحل السبالة يهبطلو ماء صالح للشرب، وينزل عالفلسة يشعل الضو... روتين مقرف!
نحنا في تونس، شربة الماء ولات Chasse aux trésors. تخرج تلوج على ستيكة ماء تحس روحك "إنديانا جونز"، وكي تخلط على آخر دبوزة تعيش نشوة الانتصار بالفم و الملا !
والضو اللي يقص ؟ هاذي اكيد دورات تكوينية مجانية باش نتراناو عالرؤية الليلية ونرجعو للرومانسية الإجبارية على ضو الشمعة.
البانان واللحم عندهم ماكلة عادية وروتينية.. نحنا في تونس عملنالهم upgrade لمرتبة المجوهرات والعملات الصعبة. البانان ولى أغلى من البيتكوين، واللحم قاطعناه خليناه أسطورة باش نحافظو على رشاقتنا ونعيشو الديتوكس الأزلي.
باهي وكي يحبو يتفرهدو و لا يصيفو وين يمشيو زعمة ؟ للمالديف ؟ للسيشال ؟ نحنا في تونس، تدفع ميزانية فواياج كامل للمالديف باش تعدي جمعة في وتيل تونسي مقابل شريط ساحلي شطرو مسكر بالوسخ... هذاكا راهو موش تلوث، هذاكا "Spa" كيمياوي يقوي المناعة، باش نهار آخر كي تحتلنا الكائنات الفضائية نطلعو أحنا الوحيدين اللي نعيشو نورمال!
بالنسبة للرياضة و لكرة القدم المقارنة اصلا لا تجوز.. هوما يتفرجو في ستادات متطورة ومكيفة. نحنا البنية التحتية الرياضية خليناها في العصور الوسطى عن قصد
نلعبو ماتشوات الكورة في 50 درجة سخانة في ستادات عبارة على مسارح رومانية.. خاطر نحنا ما نصنعوش ملاعبية، نحنا نصنعو في Gladiators و محاربين.
هوما يتنقلو في بلدانهم من النقطة أ للنقطة ب في قطارات مغناطيسية كئيبة حزينة من دون سائق….. نحنا الدولة وفرتلنا ترينوات "Vintage" من وقت حائط برلين والحرب العالمية، تركب في التران تحس روحك في وثائقي تاريخي، سوسبانس ومغامرات ، يوصل وإلا ما يوصلش!
والتاكسيات؟ سوم الكورسة يخليك تحس روحك عايش في موناكو.. والمشكل موش في الفلوس، المشكل إنك لازمك إنت تمشي في ثنية التاكسيستي موش هو يهزك لثنيتك!
المواطن الغربي يلعب في الحياة في الـ 'Easy Level' ومصدق روحو عايش.. أحنا حاطينها 'Mode Insane'، دافعين دم قلوبنا و نضحكو مالفوق!
تونس موش مجرد بلاد و رقعة جغرافية، تونس 'ستاج الوحش'.. اللي يسلكها هوني، تنجم تبعثو لأي بلاصة في العالم، موش باش يعيش، اما باش يعلّمهم كيفاش يعيشو!
(منقول
