http://www.uthukelatimes.co.za/

Uthukela News Times Plus, 13 OBC Building, Ladysmith (2026)

31/05/2026

imashi yeMarch And March enokuthula izosuka e-Illing Road ngolwesibili ngo 8 ekuseni. Kumenywa abantu baseMnambithi ukuthi babe yingxenye yayo. Akugqokwa imifaniswano yePolitiki. UPhakelumthakathi uzobe ehola amabutho.

31/05/2026

Kushukuthi ikhona lembewu embi ekwaSibiya.

31/05/2026

KUBOSHWE IPHOYISA ELASIZA EKWEQENI KWEZIBOSHWA LITHENGWE NGO R5000

DURBAN – Amaphoyisa ophiko lwe-Anti-Corruption KwaZulu-Natal asebophe iWarrant Officer yaseKwaMsane ngezinsolo zokusiza iziboshwa ukuba zeqe esitokisini, ukusebenzisa amandla omthetho ngendlela okungesiyo kanye nenkohlakalo.

Ngokwesitatimende samaphoyisa, ngo-27 Febhuwari 2024 iziboshwa ezintathu zabaleka esitokisini saKwaMsane Police Station ngemuva kokusika izinsimbi zamafasitela kanye nophahla lwensimbi.

Ngemva kwenyanga eyodwa, omunye walabo ababebalekile, uSibusiso Gumede, waphinde waboshwa ngesikhathi amaphoyisa esenza umkhankaso wokuvimba umgwaqo eVryheid.

Uphenyo lwamaphoyisa luveze ukuthi ukubaleka kwalezi ziboshwa kwakuhlelwe yiDetective Warrant Officer okusolwa ukuthi wazihlinzeka ngesaha lokusika insimbi ngemuva kokuthi ekhokhelwe imali engu-R5 000.

Ngemuva kokuqoqwa kobufakazi, inkantolo yakhipha incwadi egunyaza ukuboshwa kwephoyisa, eliboshwe ngoLwesihlanu, mhlaka 29 Meyi 2026.

Kulindeleke ukuthi livele eNkantolo kaMantshi yaseKwaMsane ngoLwesibili, mhlaka 2 Juni 2026, libhekane namacala okusiza iziboshwa zibaleke, ukwehlula ukusebenza kobulungiswa kanye nenkohlakalo.

Amaphoyisa athe uphenyo lusaqhubeka futhi azimisele ukuqinisekisa ukuthi noma ngubani otholakala ephula umthetho, kungakhathaliseki ukuthi uyiphoyisa noma cha, uyabhekana nengalo yomthetho.

30/05/2026

UNGQONGQOSHE USHINGA UHAMBELE E-GREYTOWN KULANDELA ISIGAMEKO SOKUDUBULA EMNDENINI WAKWA-KHOZA

UNgqongqoshe wezokuThuthukiswa koMphakathi esifundazweni sakwaZulu-Natal uNksz Mbali Shinga, uvakashele umndeni wakwaKhoza eGreytown, eMsinga, ngemuva kwesigameko sokudubula esishiye kushone oyedwa kwalimala ababili.

Ngokwemibiko kuthiwa owesilisa udubule umzala wakhe, wabe esedubula ebhekise kwamanye amalungu omndeni amabili abezama ukumvimba. Kusolwa ukuthi ngaleso sikhathi ube phuze uphuzo oludakayo edle izidakamizwa.

Oyedwa wezisulu usesibhedlela sisesimweni esibucayi. Elinye ilungu lomndeni lilashelwe ukulimala engalweni.

UNgqongqoshe uShinga ubehambisana nomfundisi wendawo nosonhlalakahle boMnyango wezokuThuthukiswa koMphakathi.Unxuse imiphakathi ukuthi ixazulule izingxabano ngokuthula futhi igweme udlame ikakhulukazi uma kukhona utshwala noma izidakamizwa waphinde wagcizelela ukuthi izigameko zodlame zibikwe emaphoyiseni ngokushesha.

30/05/2026

ZIMKHALELE OTHOLAKALE NEZIDAKAMIZWA E-CHATSWORTH

Umkhankaso wokulwisana nobugebengu owenziwe ngamaphoyisa kaMasipala weTheku uholele ekutheni kuboshwe owesilisa oneminyaka engu-42 ubudala endaweni yaseChatsworth namhlanje zingama-30 kuNhlaba wezi-2026.

Kulomsolwa kutholakale izinhlobo ezahlukene zezidakamizwa okubalwa luzo
-280 amaphilisi e-heroin
-Izingcezu ezingu-1,250 ze-rock co***ne
-Amaphilisi angu-375 e-mandrax
-nemali engu R179,400 okusolwa ukuthi eyokudayiswa kwazo izidakamizwa. Kanti kubikwa ukuthi lezidakamizwa ezitholakele zingabiza imali engu ku-R154,950.

Umsolwa uboshiwe wagqunywa e-Chatsworth SAPS ngamacala ahlobene nokutholakala nezidakamizwa.

30/05/2026

IMEYA YASEBAQULUSI ITHEMBISE UKUXHUMANA NEZINHALAKA EZIBALULEKILE UKULEKELELA UMNDENI OSHELWE UMUZI

UMeya kaMasipala Abaqulusi uKhansela uSifiso Mkhwanazi uzibophezele ekutheni athengele abantwana boMndeni wakwaKhanyile endaweni yaseBhekuzulu kulomasipala , umfaniswano wesikole ukuze bengaphazamiseki eskoleni,Umndeni wakwaKhanyile uvelelwe wumshopi wokushelwa umuzi kanye nakho khone obekuphakathi kulelisonto.

uMeya uMkhwanazi ehambisana nekhansela lendawo bahambe bayohlanganisa amehlo nalomndeni kulandela lesisgameko,uphinde wakuveza ukuthi ukwazile ukuxhumana noMnyango wezokuThuthukiswa komphakthi kanye nezinye izinhlaka ezibalulekile kuloludaba ezifana no-Operation sukuma sakhe ukuze bezokwazi ukulekelela omndeni, wathi uzohlangana nezinhlaka ezifanele ukuqinisekisa ukuti lomuzi uyavusa kabusha .

30/05/2026

BAGIXABEZWE NGODILIKAJELE ABALAHLWE NGELOKUHLUKUMEZA NOKULAXAZA INGANE

Indoda eneminyaka ewu-30 nonkosikazi wayo oneminyaka ewu-30ubudala bagwetshwe udilikajele neminyaka engu 30 bebhadla ejele emuva kokulahlwa ngamacala okuzama ukubulala, ukulaxaza, ukuhlukumeza nokusabisa ingane.

Ummangalelwa wesibili kulelicala ugwetshwe omunye udilikajele oneminyaka ewu-20 ngokuphoqa ukunukubeza ngokocansi namacala amabili okuzama ukubulala.

Iezigameko zenzeka eWelbadacht East ngaseThekwini lapho kwakuhlala khona abamangalelwa.

Umgilwa wayeneminyaka ewu-10 ngesikhathi kwenzeka isigameko, kubikwa ukuthi,ungudadewabo kammangalelwa wesibili. Ubufakazi obunekwe enkantolo buveza ukuthi umgilwa washonelwa wunina wase ehlala nabamamgalelwa.
Izigameko zokuhlukumeza zaqala ngo-2021 zaqhubeka nango-2023.

Umgilwa wayeshawa ngebhodlela lobhiya lize liphihlike, wagwazwa kaningi, washawa ngesando, washawa ngenduku yomshanelo, washiswa ngamanzi abilayo encishwa nokudla. Kwakuphoqa ukuthi antshontshe ukudla bese ephinde eshayelwe lokho

Umgilwa washawa waze waphuma namazinyo nezinwele. Wayevalelwa angakwazi ukuya esikoleni.

Ummangalelwa wesibili waphoqa umgilwa ukuthi enze izenzo zocansi, kanti futhi wake wabhunyela umgilwa nezinye izihlobo ngophethiloli esabisa ngokubashisa.

Okhulumela iNational Prosecuting Authority uNatasha Ramkisson-kara uthi,umgilwa waphuma ngewindi lasegumbini lokugezela wabaleka ngesikhathi kuhambe ugesi. Wabalekela kwamakhelwane wacasha khona kwase kubizwa amaphoyisa ngakusasa. Umgilwa wayiswa e-RK Khan Thuthuzela Care wathola usizo.

Ummangalelwa wokuqala nowesibili bagwetshwe udilikajele ngecala lokuzama ukubulala, iminyaka ewu-10 ngecala ngalinye lokulaxaza ingane, ukuhlukumezeka ingane nokusabisa.

Ummangalelwa wesibili ugwetshwe udilikajele ngecala lokuphoqa izenzo zocansi neminyaka ewu-10 ngecala ngalinye kwawokuzama ukubulala okubalwa khona nesihlobo esaba wumgilwa.

30/05/2026

IYAPHINDEKA I-ALBUM KAMENZI ENTSHA

angisiyona lenhlobo okudingeka ngize ngiyilalele kaningi i-Album yomculo ukuze ngizwe ukuthi ngabe ishaya khona yini noma cha, kodwa lena entsha sha kaMenzi ngizibone sengibuyela kaningi ngiyilalela. Hhayi ngoba bengingayizwa kahle, kodwa ngoba zonke izingoma ezikule-Album zimnandi futhi ziyaphindeka.

UMenzi usanda kukhipha i-Album esihloko sithi, Ezohlala Nawe. Kumele ngikubeke kucace ukuthi uMenzi uyinkunzimalanga ekubhaleni izingoma ezikhuluma ngqo nabantu.

Siqale nje sibuka ikhava yale-Album yehluke kakhulu kumakhava amacwecwe kaMenzi edlule. Ngokwejwayelekile, ikhava yama-Album akhe avamise ukuveza uhlangothi lokuba ngusomahlaya kwakhe, kuyaye kube yizithombe ongajwayele ukuzibona kumakhava kaMaskandi. Nakulokhu uphinde futhi wenza okwehlukile kunokwejwayelekile, esikhundleni sokuthi kube nguyena osesithombeni kuvela ezinye nje izinsizwa engicabanga ukuthi ngamagidangoma akhe. Lokhu akuvamile kuloMaskandi wamanje lapho abaculi beziqhakambisa bona.

Kubukeka engathi uMenzi uthathe isikhathi sakhe ehlanganisa leli cwecwe. Ubona nangabanye abaculi bakaMaskandi abapikile. Uyabona ukuthi ubengapiki nje noma ngubani ngoba ekhona ngaleso sikhathi kodwa ubefuna abantu abazomnika unqambothi lwesithako ezingomeni zakhe. Ulande abaculi abafana noShenge Wasehlalankosi, Inkosi Yamagcokama, uJaiva Zimninke, noMdumazi.

Le-Album noma imnandi yonke kodwa zine izingoma ezingenze ngazibona ukuyi hhiya, sengiyibhinca impela. Ingoma yokuqala ephinde ibe yisihloko se-Album ethi Azohlala Nawe, ngenye yezingoma ezihamba kakhulu ezinkundleni zokuxhumana futhi ifanele ngempela ukuba yisihloko sayo le-Album, ayizibeki uthanda ungathandi.
Bese kuba yilena ethi Kushoda Obaba ahambisana kuyo noJaiva kanye noShenge. Lena ke ingunombolo -4, thina esingasenabazali isenza sibe nosizi isikhumbuze ukubaluleka kwabazali. isitayela sikaShenge sokumemeza kamnandi iyenza ibe lula ezindlebeni, kanti izwi elizinzile nelipholile likaJaiva liyenza ijule ngokwanele ukukhipha unyembezi endodeni.

Ingoma engunombolo - 5 ethi Ama-Ice izocasula izincelebane ezithanda ukupepenyeka nezigwili namalunda. Lenake ikhuluma ngesikubona nsukuzonke ngezimpelasonto ebumnandini lapho ubona khona amanye amadoda ekhothamela amanye ngoba enemali. Ikhona ke nezothandwa kakhulu ngabesifazane ethi Izinkinga Zami, imnandi impela nayo kodwa kithi maqonqela ayehli kahle. Abesifazane bazoyithanda kakhulu mangibheka nje, mhlawumbe namashalenji kaTik Tok azoyifanela le kakhulu.

Ngeke ngiziqede zonke lezi zingoma uzozizwela nawe, zimnandi zonke. Kukhona ethi Akunamalunda, uma ulalelisa kahle uzomuzwa ukuthi uyagadla umenzi kulengoma, ukuthi kubanike, ofuna ukusigqoka isicathulo sizomenela.

I-Album isiyonke ihlanganiswe kahle, izinsimbi zisendaweni yazo, kanti namazwi angena kahle wonke. Onjiniyela nabo kufuneka sibancome. muhle kakhulu umsenbenzi!

30/05/2026

AMAPHOYISE ATHE ANGEKE APHUMULE ENGABATHOLI ABABULALE AMAPHOYSA AMABILI

KWAMASHU – UMajor General Nosipho Madondo woPhiko lweCrime Intelligence kanye noMajor General Dr Siyanda Ngcobo, oyiPhini likaKhomishana waKwaZulu-Natal kwezokuSekela Imisebenzi, bahole ithimba lamaphoyisa emngcwabeni kaSajini Mandla Khuzwayo obubanjelwe eDr JL Dube High School, KwaMashu.

USgt Khuzwayo noCaptain Cornelius Nel badutshulwa ngesikhathi behlaselwa ngabantu abangaziwa eMount Edgecombe. Kuthiwa abasolwa basebenzise izikhali ezinamandla badubula kaningi kulaba bobabili. UCaptain Nel washonela endaweni yesigameko, kwathi uSgt Khuzwayo, oneminyaka engu-39 ubudala, waphuthunyiswa esibhedlela ngendiza kodwa washona ngemuva kokulwa nokulimala kwakhe cishe inyanga yonke.

UMajor General Madondo uthe uKhuzwayo ubeyingxenye ebalulekile yemizamo yokulwa nobugebengu obuhleliwe futhi kuyadabukisa ukuthi ugcine ebulawe yilobo bugebengu ayelwa nabo.

“Uphenyo selusezingeni eliphezulu futhi ngeke siphumule kuze kube yilapho ababulali bakhe beboshwa futhi belethwa phambi kobulungiswa,” kusho yena.

USgt Khuzwayo ubekwe endaweni yakhe yokugcina e-Amatikwe, eNanda.

30/05/2026

KUKHISHWE IZINCWADI ZOKUBOSHWA KWAMASOSHA AYISITHUPHA E-SANDF ASABALALEKILE

JOHANNESBURG – Inkantolo isikhiphe izincwadi zokuboshwa kwamasosha ayisithupha e-South African National Defence Force (SANDF) Special Forces abalekile ngemuva kokuba ibheyili lawo ihoxisiwe ecaleni lokubulawa kwesikhulu sakwaHawks ngo-2023.

La masosha ayingxenye yeqembu labangu-12 ababhekene namacala okubulala uLieutenant-Colonel Frans Mathipa, owadutshulwa wabulawa ku-N1 ngaseHammanskraal ngo-Agasti 2023. Ngesikhathi ebulawa, uMathipa wayephenya izinsolo zokuthunjwa kwabantu ababili base-Ethiopia eMall of Africa ngoDisemba 2022.

Abasolwa babhekene namacala anzima okubalwa kuwo ukubulala, ukuthumba, uzungu lokubulala, ukukhwabanisa kanye nokuphazamisa ukusebenza kobulungiswa.

Izincwadi zokuboshwa zikhishwe ngemuva kokuthi behlulekile ukuzinikela emaphoyiseni ngaphambi komnqamulajuqu owawubekwe yinkantolo ngo-23 Januwari 2026. Nakuba babevunyelwe ibheyili lika-R10 000 umuntu ngamunye ngoJulayi 2025, iNkantolo eNkulu yaseGauteng yaguqula leso sinqumo yathi izizathu zokuthi baqhubeke bekhululekile azigculisi.

Amasosha ayisithupha asengakatholakali futhi indawo akuyo ayikaziwa. Kanti abanye abayisithupha ababhekene naleli cala, okubalwa kubo noBrigadier General Solomon Lechoenyo, basakhululekile ngebheyili njengoba belindele ukuqulwa kwecala.

Bonke abasolwa kulindeleke ukuthi baphinde bavele eNkantolo yaseRandburg ngomhlaka 30 Januwari, kanti uphenyo lusaqhubeka.

Uthukela News Times Plus

31/05/2026

31/05/2026

31/05/2026

30/05/2026

30/05/2026

30/05/2026

30/05/2026

30/05/2026

30/05/2026

30/05/2026

Address

Telephone

Website

Alerts

Contact The Business

Shortcuts

Share